Sunday, June 8, 2014

NDF ပဲခူးတိုင်းစည်းရုံးရေးကော်မတီဖွဲ့စည်းရေး အစည်းအဝေး NDF ပါတီဌာနချုပ်တွင်ကျင်းပ



-


အမျိုးသားဒီမိုကရေစီအင်အားစုပါတီ

သတင်းထုတ်ပြန်ချက်ရေးအဖွဲ့

သတင်းထုတ်ပြန်ချက်အမှတ် (၂၂-၂-၂၀၁၄)

ရက်စွဲ။  ၇-၆-၂၀၁၄

NDF  ပဲခူးတိုင်းစည်းရုံးရေးကော်မတီဖွဲ့စည်းရေး အစည်းအဝေး NDF ပါတီဌာနချုပ်တွင်ကျင်းပ

         ၇-၆-၂၀၁၄ ရက်နေ့ နေ့လည် ၁း၀၀နာရီတွင်  အနောက်မြင်းပြိုင်ကွင်းလမ်းရှိ NDF  ပါတီဌာနချုပ်ရုံး တွင်  ပဲခူးတိုင်းစည်းရုံးရေးကော်မတီ ပြန်လည်ဖွဲ့စည်းရေးနှင့် ပဲခူးတိုင်းအတွင်း စည်းရုံးရေးကိစ္စများဆွေးနွေးပွဲ ကို  ကျင်းပပြုလုပ်ခဲ့သည်။

         ထိုအစည်းအဝေးသို့ ပါတီဥက္ကဌ ဦးခင်မောင်ဆွေ၊ ဒု ဥက္ကဌ ဦးစိန်လှဦး၊ အထွေထွေအတွင်းရေးမှူး ဒေါက်တာဝင်းနိုင်၊ ပဲခူးတိုင်းတာဝန်ခံ အတွင်းရေးမှူး(၂) ဦးနေမင်းကျော်၊ ဗဟိုအလုပ်အမှုဆောင်ကော်မတီဝင် များဖြစ်ကြသော ဦးတိုးတိုးနှင့် ဦးအောင်ဇင်၊ ပဲခူးတိုင်းစည်းရုံးရေးကော်မတီဝင်များ၊ မြို့နယ်များမှ မြို့နယ် ကိုယ်စားလှယ်များ  စုစုပေါင်း ၅၀ ကျော် တက်ရောက်ခဲ့ကြသည်။

         အစည်းအဝေးတွင် သဘာပတိအဖြစ် ဦးခင်မောင်ဆွေ၊ အခမ်းအနားမှူးအဖြစ် ဦးနေမင်းကျော်တို့က ဆောင်ရွက်ခဲ့သည်။ သဘာပတိမှ အမှာစကားပြောကြားရာတွင် ပဲခူးတိုင်းသည် ပါတီအတွက် အခရာကျသဖြင့် ပဲခူးတိုင်းစည်းရုံးရေးကော်မတီကို လုပ်ကိုင်နိုင်စွမ်းရှိသူများ ပါဝင်လာနိုင်ရေးအတွက် အစည်းအဝေးခေါ်ယူကျင်း ပရခြင်းဖြစ်ကြောင်းနှင့် ပဲခူးတိုင်းအရှေ့ခြမ်းနှင့် အနောက်ခြမ်းများမှ တင်သွင်းကြသော ကိုယ်စားလှယ်များ အချင်းချင်း ညှိနိုင်းကြပြီး သင့်တော်သူများဖြင့် ပဲခူးတိုင်းစည်းရုံးရေးကော်မတီကို ရွေးချယ်ပေးရန် မှာကြားခဲ့ သည်။ ထို့နောက် ပါတီအထွေထွေအတွင်းရေးမှူး ဒေါက်တာဝင်းနိုင်မှ ရွေးချယ်ရာတွင် လုပ်ဆောင်ရမည့် လုပ်ထုံးလုပ်နည်းများကို ရှင်းပြခဲ့ပြီး တက်ရောက်လာသော မြို့နယ်များမှ တင်သွင်းသော ကိုယ်စားလှယ်များကို စာရင်းပြုစုပြီး ရရှိလာသော ကိုယ်စားလှယ်များမှ ပဲခူးတိုင်းစည်းရုံးရေးကော်မတီကို လာမည့် ၂၈-၆-၂၀၁၄ ရက်နေ့တွင် ဖွဲ့စည်းရန် အချိန်သတ်မှတ်ပေးခဲ့သည်။

         ထို့နောက် တက်ရောက်လာသောမြို့နယ်များမှ စည်းရုံးရေးကိစ္စ၊ လယ်ယာမြေကိစ္စနှင့်  ပါတီလုပ်ဆောင် မှုအခြေအနေများကို မေးမြန်းရာတွင် ပါတီဥက္ကဌ ဦးခင်မောင်ဆွေ၊  ဒေါက်တာဝင်းနိုင်၊ ဦးအောင်ဇင်တို့မှ ပြန်လည် ဖြေကြားပြီး ပါတီဒုဥက္ကဌ ဦးစိန်လှဦးမှ ပါတီဝင်များ ထားရှိရမည့် စိတ်ထားများအကြောင်း ပြောကြားပြီး အစည်းအဝေးကို ညနေ ၄း၀၀နာရီတွင် ရုပ်သိမ်းခဲ့ပါကြောင်း သတင်းထုတ်ပြန်အပ်ပါသည်။